Christoph Prang, Johrgang 1966, is en Hamborger Jung, grootworrn twüschen Boomwall un de Lannungsbrüggen, man mit Wuddeln in Oostholsteen. Sien Öllern kaamt ut Eutin un hebbt in Bujendörp en ole Kaat as Ferien- un Wekenennhuus hatt. Vun de Lüüd dor ümto, vun de Verwandtschop in Eutin un vun sien Vadder hett he Wöör un Seggwiesen op Platt opsnappt, aver as Kind sülvst noch nich veel snackt. Dat keem later.
Na en Utbillen to’n Koopmann in’n Groot- un Butenhannel hett he Germanistik studeert un vele Johr in de USA un Kanada verbröcht. In de Tiet hett he anfungen, sik neger mit Plattdüütsch to befaten, un dat hett em bet hüüt nich wedder loslaten.
Christoph Prang hett en Dokter in Düütsche Spraak un Literatuur. He verdeent sien Geld as Expert för Kommunikatschoon un PR. „In de Nootopnahm“ is sien eerstet Book op Platt.